బిగ్ బాస్ లో 'టికెట్ టు ఫినాలే' .. రేవంత్, శ్రీసత్య మధ్య గొడవ!

బిగ్ బాస్ హౌస్ లో 'టికెట్ టు ఫినాలే' కి సంబంధించిన గేమ్స్ నడుస్తున్నాయి. మొదటి నుంచి కూడా ప్రతి గేమ్ లోను చురుకుగా ఆడుతూ వస్తున్న శ్రీసత్య ఆందరి కంటే ముందుగా ఈ గేమ్ నుంచి తప్పుకోవడం ఆశ్చర్యం. ఇనయా తరువాత జరిగిన పరిణామాల కారణంగా కీర్తి .. రోహిత్ కూడా ఈ గేమ్  నుంచి తప్పుకున్నారు. దాంతో మిగిలిన రేవంత్ .. శ్రీహాన్ .. ఆదిరెడ్డి .. ఫైమాకి బిగ్ బాస్ మరో గేమ్ పెట్టారు. 

ఒక చెక్క ఫ్రేమ్ కి పొడవైన చెక్క గరిట అమర్చబడి ఉంటుంది. ఆ గరిట మధ్య భాగం మాత్రమే ఆ ఫ్రేమ్ కి కనెక్ట్ అయ్యుంటుంది. ఒక చివరన పింగాణీ ప్లేట్స్ ఒకదానిపై ఒకటి పేర్చుతూ, అవి పడిపోకుండా మరో చివరన పట్టుకుని హ్యాండిల్ చేస్తుండాలి. ఎవరి ప్లేట్స్ క్రింద పడిపోతే వారు ఈ గేమ్ నుంచి పక్కకి తప్పుకోవలసి ఉంటుంది. ఈ గేమ్ కి శ్రీ సత్య - ఇనయా సంచాలకులుగా వ్యవహరించారు. 

ఈ గేమ్ లో ప్లేట్స్ ను బ్యాలెన్స్ చేయలేక ముందుగా ఫైమా .. ఆ తరువాత రేవంత్ .. శ్రీహాన్ బయటికి వచ్చారు. చివరి వరకూ ఆదిరెడ్డి మాత్రమే ఉన్నాడు. అయితే తాను బరిలో ఉన్నప్పుడు సంచాలకురాలిగా శ్రీసత్య కాలయాపన చేయడం వలన, అంతసేపు తాను బ్యాలెన్స్ చేయలేకపోయానని రేవంత్ ఆరోపణ చేశాడు. ఆ తరువాత పోటీదారులు ఇబ్బంది పడకుండా చూసిందంటూ మండిపడ్డాడు. ఆయన శ్రీసత్యను శాడిస్టు అనడంతో ఆమె ఒక్కసారిగా ఫైర్ అయింది. ఓటమిని తీసుకోలేక అలా మాట్లాడటం కరెక్టు కాదంటూ అసహనాన్ని వ్యక్తం చేసింది. ఈ విషయంపై ఇద్దరి మధ్య పెద్ద రచ్చనే జరిగింది.